مـن زمان و انا صغير كان عندي حلم ... أكبر أدرس أتخرج , اسافر ع اليابان .. ايوه اليابان و أهلي شجعوني لإني بدي العلم الحقيقي للحاسوب ... بس لما كبرت و درست و هيني بدي اتخرج , تغير الوضع ... صرت أحس حـالي بلا قيمة جنب أهلي .. بلا قيمة بدون أخوي , فكرت كثير , أتغرب بالخليج ولا اوروبا ... اجمع ليرات أشتري سياره أرجع للبلد اشتري بيت و أتزوج ...

بس كل يوم كان بيمر ... بيصير معي موقف بيشدني للبلد , ما انا ابن البلد و ربيت فيها ليه اتركها ؟ ليه اخلي خير شباب البلد يروح لغيرها ؟ كتير انتقدت و عارضت و تظاهرت ... أنا معهم الراتب قليل بس والله البلد حلوه

كل ما بتخيل حالي بشارع بـ لندن , باريس , روما , مدريد ... بجرب اتخيل اني وحيد , بدون صاحب اضحك معو و ننكش مخنا .... بدون شلة تونسني و تفك ضيقي ... بدون كاسة قهوة بـ 30 قرش .. بدون صوت الناس و نظراتهم ... بفقد قيمة الغربه و الاحساس فيها

كل ما بتخيل حالي بلا إمي تصحيني الصبح عالدوام .. تساوي لي كاسة الشاي , ارجع الاقيها طابخه اللي فيه الخير .. و ضحكتها و دعوتها معبيه البيت ... بفقد الإحساس بحب السفر

كل ما بتخيل حالي بلا اخوي ... بدون ما اتطاوش معه ناقر و نقير .. بدون ما احس إنو في حد بدو ياني لجنبو و بيسأل عني لو غبت .. بتخيل حالي مع أخوي في الغربه .. و بفضل أضل بالبلد

وصلت لقناعه ... مش بس اصلي وطن , انا بيتي و اهلي و اصحابي و حارتي و زقاق عـمان , كلها بتمثل عندي وطن ... أنا حبيبتي وطن , صاحبي اللي بعزني وطن , إمي أحن وطن , أخوي أروع وطن , أنا أختي أرق وطن , أنا كل شبر بيمثلني بعـمان بالنسبه إلي وطن ...